Silene dioica

Planta perenne, dioica, con un ou varios talos moi pelosos, pero pouco glandulosos, ata 80 cm., pouco ramificados, que xorden dun rizoma. As follas son tomentosas, as inferiores ata 14 x 6 cm., espatuladas sobre longos pecíolos, e as superiores estreitándose ata chegar a ovado-lanceoladas.

As flores aparecen dispostas en pequeno número en dicasio, con cálice de 9-14 mm., ovoideo. Pétalos con limbo de 7-14 mm., bífidos, vermellos ou de cor rosa forte, e con unha unlla auriculada na parte superior.

Froito en cápsula de 10-14 mm., ovoidea. Carpóforo inexistente.

Florece entre abril e xullo, podéndose ver en zonas sombrizas ou de bosques.

Lugar de observación: Beiras do río Ulla. A Cornella. Berredo. Agolada.